ယေရမိ အခန်းကြီး (၁)


၁-၃ယုဒရှင်ဘုရင် အာမုန်သား ယောရှိမင်းနန်းစံဆယ်သုံးနှစ်တွင်၎င်း၊ ယုဒရှင်ဘုရင် ယောရှိသား ယောယကိမ် လက်ထက်၌၄င်း၊ ယုဒရှင်ဘုရင် ယောရှိသား ဇေဒကိမင်းနန်းစံဆယ်တစ်နှစ် စေ့၍ ပဉ္စမလတွင်၊ ယေရုရှလင်မြို့သား တို့ကို သိမ်းသွားချုပ်ထားသည်တိုင်အောင်၊ ထာဝရဘုရား၏ ဗျာဒိတ်တော်ကို ခံရသော ဗင်္ယာမိန်ပြည်၊ အာနသုတ် မြို့နေ ဟိလခိသားယဇ်ပုရောဟိတ် ယေရမိစကားမှာ၊

၎ထာဝရဘုရား၏ နှုတ်ကပတ်တော်သည် ငါ့ဆီသို့ရောက်၍ မိန့်တော်မူသည်ကား၊ ၅သင့်ကို အမိဝမ်းထဲ၌ ငါမဖန်ဆင်းမှီ သင့်ကိုငါသိပြီ။ မဘွားမှီကပင် သင့်ကိုငါသန့်ရှင်းစေ၍၊ လူအမျိုးမျိုးတို့အဘို့၊ ပရောဖက်အရာ၌ ခန့်ထားပြီဟု မိန့်တော်မူ၏။ ၆ငါကလည်း၊ အိုအရှင်ထာဝရဘုရား၊ အကျွန်ုပ်သည် မဟောမပြောတတ်ပါ။ သူငယ်ဖြစ် ပါ၏ဟု လျှောက်လျှင်၊ ၇ထာဝရဘုရားကလည်း၊ အကျွန်ုပ်သည် သူငယ်ဖြစ်ပါ၏ဟု မပြောနှင့်။ အကြင်ရှိရာသို့ သင့်ကိုငါစေလွှတ်၏၊ ထိုသူရှိရာသို့ သင်သွားရမည်။ အကြင်စကားကို ငါမှာထား၏၊ ထိုစကားကို သင်ဆင့်ဆိုရမည်။ ၈သူတို့ကို မကြောက်နှင့်။ သင့်ကိုကယ်နှုတ်ခြင်းငှါ သင်နှင့်အတူငါရှိသည်ဟု မိန့်တော်မူပြီးမှ၊ ၉လက်တော်ကိုဆန့်၍ ငါ့နှုတ်ကိုတို့တော်မူလျက်၊ သင်၏နှုတ်၌ ငါ့စကားကိုငါသွင်းထားပြီ။ ၁ဝကြည့်ရှုလော့။ သင်သည် နှုတ်ပယ်ဖြိုချ ဖျက်ဆီးမှောက်လှဲရသော အခွင့်၊ တည်ဆောက်စိုက်ပျိုးရသောအခွင့်နှင့် သင့်ကိုလူအမျိုးမျိုးတို့၏ တိုင်းနိုင်ငံများအပေါ် မှာ ယနေ့ငါခန့်ထားပြီဟု မိန့်တော်မူ၏။

၁၁တဖန်ထာဝရဘုရား၏ နှုတ်ကပတ်တော်သည် ငါ့ဆီသို့ရောက်၍၊ ယေရမိ၊ သင်သည်အဘယ် အရာကို မြင်သည်နည်းဟု မေးတော်မူလျှင်ငါက၊ အကျွန်ုပ်သည် ဗာတံကိုင်းကိုမြင်ပါ၏ဟု လျှောက်သော်၊ ၁၂ထာဝရဘုရားက၊ သင်သည်မှန်ကန်စွာမြင်ပြီ။ အကြောင်းမူကား၊ ငါ့စကားကိုပြည့်စုံစေခြင်းငှါ၊ ငါစောင့်နေမည်ဟု မိန့်တော်မူ၏။

၁၃တဖန်ထာဝရဘုရား၏ နှုတ်ကပတ်တော်သည် ဒုတိယအကြိမ်ငါ့ဆီသို့ရောက်၍၊ သင်သည်အဘယ် အရာကို မြင်သနည်းဟု မေးတော်မူလျှင် ငါက၊ အကျွန်ုပ်သည်ဆူပွက်သော အိုးကင်းကိုမြင်ပါ၏။ မြောက်ဘက်သို့မျက်နှာပြု လျက်ရှိပါ၏ဟု လျှောက်လျှင်၊ ၁၄ထာဝရဘုရားက၊ မြောက်မျက်နှာဘက်က ဘေးဥပဒ်သည် ဤပြည်သားတို့အပေါ် သို့ထွက်လာလိမ့်မည်။ ၁၅အကြောင်းမူကား၊ မြောက်တိုင်း နိုင်ငံသားအမျိုးမျိုးအပေါင်းတို့ကိုငါခေါ်၍၊ သူတို့သည် လာပြီးလျှင်၊ ယေရုရှလင်မြို့ တံခါးဝများတို့၌၄င်း၊ မြို့ရိုးပတ်ဝန်းကျင်အရပ်ရပ်တို့၌၄င်း၊ ယုဒမြို့ရွာ အလုံးစုံတို့၌၄င်း မိမိတို့ရာဇပလ္လင်များကို အသီးအသီး တည်ထားကြလိမ့်မည်။ ၁၆ပြည်သူပြည်သားတို့သည် ငါ့ကိုစွန့်သောအပြစ်၊ အခြားသောဘုရားတို့အား နံ့သာပေါင်းကိုမီးရှို့သောအပြစ်၊ မိမိတို့လက်ဖြင့်လုပ်သောအရာကို ကိုးကွယ်သော အပြစ်ရှိသမျှတို့ကြောင့်၊ သူတို့ကိုငါစစ်ကြော၍၊ အပြစ်နှင့်အလျောက်စီရင်မည်။ ၁၇သို့ဖြစ်၍ သင်သည်ခါးပန်းကိုစီး၍ ထလော့။ ငါမှာထားသမျှကို သူတို့အားဟောပြောလော့။ သူတို့ရှေ့မှာ သင့်ကိုငါအရှက်မခွဲရမည်အကြောင်း သူတို့ကိုမကြောက်နှင့်။ ၁၈ကြည့်ရှုလော့။ ယုဒရှင်ဘုရင်၊ မင်းသား၊ ယဇ်ပုရောဟိတ်၊ ပြည်သူပြည်သားတည်း ဟူသော တနိုင်ငံလုံးတဘက်၌၊ ခိုင်ခံသောမြို့၊ သံတိုင်၊ ကြေးဝါထရံအရာ၌ သင့်ကိုယနေ့ငါခန့်ထား၏။ ၁၉သူတို့သည် သင့်ကိုစစ်တိုက်၍ မနိုင်ရကြ။ သင့်ကိုကယ်နှုတ်ခြင်းငှါ၊ သင်နှင့်အတူငါရှိသည်ဟု ထာဝရဘုရားမိန့်တော်မူ၏